SAGBAY-LUWAG ANG GIPANGITA NI NOY KIKOY

Pagdibuho ang hilaw sa butang nga adunay kakulang. Dili pa angayan kutloon gikan sa punuan, aslom kon tilawan. Sa hilaw ikaw magtagamtam. Kon kini masubraan, hinog ug lata ang padulngan. May mga binuhat nga hilaw ang ilogan, magtabisay ang laway daw gitiawan.

Si Noy Kikoy naghiwaos, nakakita ug walay hilam-os.

‘Noy, ngano’ng nagpasalipod man ta?” pulong pa ni Terry.

“Day, maayo nang ingon niini aron ka makatarong ug tilaw. “ ni Noy Kikoy pa nga wala mahimutang.

“Pero, Noy basin ug makit-an ta’s imong asawa. Selosa ra ba na siya.” mabalak-on’g tubag ni Terry.

PLANTSA

saksi’s init nga binuhatan,
suki kini sa mga utawan
ibagnos, iduot painitan
mga utawan, iyang hap-an
sa kainit ug pagpatul-id
siya ang giila’ng batid
adlaw ug gabii ang pagplantsa
dagko’g gagmay maplantsa

NANGHUY-AB SI NOY SUTOY

Magnganga ang baba, uban sa mata’ng pinaduka. Mogawas kini sa kakapoy, sagad makita sa tawong lapoy,
Sa mga tudlo maghamoy, magyaka ug mangandoy.

Usa ka buntag niana sulod sa kan-anan.

“Kadugay baya nimo’ng naabot, ganina ra ko’ng nagpaabot.” nagbagolbol si Noy Sutoy samtang nagbasa sa gitunol nga listahan sa presyo sa sud-an sa kan-anan.

KADAUGAN UG KAPAROTAN

padulngan ug sangpotanan,
ang kadaugan ug kaparotan,

kadaugan

kadaugan sukwahi sa kaparotan,
paningkamot maoy iyang gigikanan,
buhaton, kuptan, kabyonan ang tanan
kahago, singot, kusog, hasta puhunan,
ibubo aron kab-oton lang ang kadaugan,
ikalipay, kini ang giilogan sa kadaghanan,
daghan ang mangamahan ug kadaugan,

KUMBIRA

Habhab ug huygo todo nga sangka,
Kutsara, tinidor ug plato magpakapaka,
Binusganay, binaskanay, puno ang baba,
Pagkaon’g nagkadaiya sa gikuninitan,
Mga dahonan hangtod sa minantikaan,

Walay ugam, walay liatan, magdinut-anay,
May magkinuotay, human sa kinan-anay,
Nga makapatabisay sa singot ug laway,
Ipagawas bulsita ug putos nga tinaguan,
Ang kan-anan ug lamesa pagahawanan,

PATUYANG

buhat nga nagpasabot ug paghinubra,
walay pagmatngon kon nagsubra na,
walay pagpanumbaling kon puwede pa
ang pagpatuyang mahitabo ni bisan kinsa.

daghan ang hinungdan sa pagpatuyang,
adunay mga kiatan’g magsige ug patuyang,
adunay kinaiyang mahilig magpatuyang
ang pagkamapasagaron, usa ka pagpatuyang.

NAPULING SI DODONG SIKYO SA BOMBA

Ang pulong bomba makapatay-og ug makapakurog, molanog ug magdahunog, kini ang bomba’ng gitanom, ug sa kaisog mohakgom. May bomba’ng makapahinuktok, makapatiurok, ikaw ilansang sa kahingangha, magsiga na lang ang imong mata.