You could put your verification ID in a comment Or, in its own meta tag Or, as one of your keywords

Cebuano Short Story: HUMOT NGA MANUHUTSUHOT

HUMOT NGA MANUHUTSUHOT

Kini ang butang nga masingohan, masimhotan, ug mopagaan sa imong ilong nga mahiligon manimhot sa lainlaing mga pahumot lakip na sa binuhat nga nagpahumot.

Kon ikaw makasimhot ug humot, molumpayat ang imong kaugatan, motuyhakaw imong kahiladman, moturok imong kahinam…

Mabalisa ka, gusto nimong ubanan ang hangin ug sination ang gipahumotan ug hangpon hangtod sa imong katagbawan, dili ka gayud mabangbang.

Pagbantay lang sa imong pagpanimhot ug humot, sa tuyo nga mohangop, mousisa sa nagpahumot, basin masugamak ka sa dakong kamot nga ikakumotkumot sa imong nawong nga mahiligon ug humot!!!!

Si Berting Palikero nakakita ug matahom nga binuhat nga nangalimyon sa kahumot. Iyang gituparan, gipabati sa iyang mga pulong gamhanan. “Bulak, pwede bang makahibalo ko?” ni Berting nga nitupad ug lingkod sa babaye.

“Unsaaa!!!” naisa ang tingog sa babaye. “Kapresko gud nimo. Dili Bulak ang akong pangalan. Wala man ko makaila nimo. Palihug lang ayaw ko ug samoka. Naa koy gihulat.” pulong sa babaye.

“Sultian tika Bulak ang imong kahumot, nagtukmod kanako nganha kanimo. Bisan pa ug dili ko makahibalo sa imong pangalan, pahibaloa lang ko sa imong pahumot ug sa imong gipahumotan.” Ni Berting nga nanukad. Naghinamhinam na nga nagpaabot sa matag pulong nga buhian sa babaye.

“Bay, kasikit gud nimong nakalingkod diha tupad sa akong asawa. Unsa? Nagpasingit ka sa imong kaibog?” pulong sa lalaki nga naputos sa patik ang mga bukton. Maskulado, bungoton ug siga kaayo ug mata nga walay pupamilok nga nagtan-aw ni Berting.

“Ah Sir, nakatupad ko sa imong asawa kay nadapit man gud akong pagtagad sa iyang pagkamaayong modala sa iyang pahumot. Naninda man gud ko ug pahumot, ako lang gisuwayan basin ug makauyon siya. Ikaw pud diay Sir, basin duna kay plano. Mahatagan tika ug maayong presyo.” pulong ni Berting nga nagpanglad-ok sa iyang laway. Gikulbaan si Berting bisan pa sa iyang nalitok nga palusot.
“Dali na Trina, mouli na ta. Nalangan man gud ko sa pagpyansa dugay naabot ang kwarta. Dako man gud ang pyansa sa akong kaso. Resulta ni sa problema nga nakapasakit ko sa akong pagkaseloso diha nimo.” dayong kawhat sa kamot sa iyang asawa aron makabarog.

“Salamat Bosyo nga nakagawas na ka.” pulong sa babaye nga mahinangpon kaayo sa lalaki.

“Swerte ka Bay nga bag-o pa kong nakapyansa.”

Mitubod ang singot niya sa agtang. Taudtaud nga wala makatingog si Berting, naghinuktok. Nakaginhawa siya ug luag human diriyot matigok tungod sa humot. (KATAPUSAN).