You could put your verification ID in a comment Or, in its own meta tag Or, as one of your keywords

Cebuano Short Story: DILI MAPUTOS ANG GASA NI KADYO SA PASKO

DILI MAPUTOS ANG GASA NI KADYO SA PASKO

Ang gasa, kini ang butang hinatag, kini magikan sa buhat nga paghatag, dako ang ngisi sa modawat ug gasa sama kadako sa nagpadungog-dungog basin pa diay, makadawat usab siya’g gasa. Ang gasa mahimo’ng usa ka pasidungog, pagpahalipay, pagpaila sa dakong kaibog. Walay makatupong sa kalalim sa bation, kon motunol na ang kamot sa naghatag, ug kini sugaton sa kamot nga modawat sa hinatag. Nagkadaiya ang gasa, adunay dagko, adunay gagmay nga gasa. May gasa nga dili maputos, dili makita apan makapalukmay, ilabi na ug pakapinan ug tam-is nga pahiyom ug pangyamyam.

“Kadyo pasko na, hain na man ang akong gasa? Gahayon ka man lang.” pulong ni Lagring.
“Day Lagring, ako gyu’ng gitipigan ning gidala nako’ng gasa alang kanimo.”

“Asa man?” dala kahibulong nga pangutana ni Lagring.
“Dia ra o.” ni Kadyo pa nga miduko padulong sa iyang pundiyo.

“Bastos, kadako gud dili ko.” nangyamiid si Lagring.
“Sayop ang imong pagtuo Day. Ako ning kuhaon ha.” gipaulian ni Kadyo si Lagring, ang babayeng hinalaran.

“Hala, labakara ra diay to? Abi ko man gud ug tinuod.”
“He, he, he, imoha na kining labakara Day. Gasa kini nga dili maputos. Ako kining gitan-ogan diri sa akong kahiladman, wala nako tuguti nga mapasipad-an sa kahanginan, aron lab-as nimong mahanggap ug masingohan ang kamatuoran, ang nagpaluyo ning gugma kong lunsay ug walay katapusan.”

“Grabeee.” mugbong pulong ni Lagring. Medyo nauknol siya apan mibanos sa iyang hunahuna ang tam-is nga mga pulong ni Kadyo ug ang gikuhaan sa labakara. (KATAPUSAN).

Bonus Balak:

PASKOHANONG PANGANDAM – pagpaabot sa pasko, kaldero sa kaayo, kaha sa katarong, kamadasigon, kamanggihatagon ug mga sugnod sa kinaiyang pagkamahigalaon andamon, mga lutuonon hikyaron, sa talad kan-anan, atong ambitan ug kuninitan ang luto sa paskohanong pangandam..

Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.