You could put your verification ID in a comment Or, in its own meta tag Or, as one of your keywords

Cebuano Short Story: BATANG LINTI SI SEBYO

batang lintiBATANG LINTI SI SEBYO (gikan sa panulat ni Inting Botikol)

“Agay, kasakit sa akong nawong!!! Nganong gitamparos man ko nimo? Unsa ma’y akong sala?” pangutana ni Arthur nga nagping-it sa hilabihang kasakit nga mora’g nakakita’g aninipot niadtong higayona.

“Ayaw ug palag ha, wala kay sala. Ang imo lang pamarog nga artistahon akong nasuyaan. Pilit kaayo sa pomada ang imong buhok samtang ako nagmantinil ug laway para ihiso. Hala lakaw na!” singhag ni Sebyo nga mapasigarbohon kaayong nagpalisngag sa iyang ilong samtang nag-atubang sa iyang mga barkada nga nangatawa.

Usa lang kini sa mga binuhatan ni Sebyo kon sul-an na siya sa iyang kamaldito. Tungod niini naila siya sa ilang lugar sa Lopez Jaena sa angga, “batang linti” kon subra kagahian ug ulo, taspokan, ug masinupakon nga pagkatawo.

Pilay pagbusikad sa daghang katuigan, nagkangokango na si Sebyo. Awop na ang iyang pangedaron. Nakapanglingo-lingo si Sebyo ning kahaponon samtang naglantaw siya sa mga batan-on nga nagkalingaw ug inom sa usa ka galong tuba sa tindahan ni Inse Basing. Nalunhaw sa hunahuna ni Sebyo ang panahon sa iyang kabatan-on.

Nasinatian usab niya ang pagkatin-edyer isip estudyante sa elementarya sa Tejero Elementary School ug sa hayskol sa USP Mabini Unit, nahimutang sa siyudad sa Sugbo.

Dali kaayong masuko si Sebyo kaniadto kon dunay motutok-tutok niya. Gaan kaayo siya ug kamot nga makasawilik ug tamparos sa binuhat nga dili niya mauyonan. Nadasig kaayo ang batan-ong hunahuna ni Sebyo sa iyang idolo sa salida niadtong panahona nga si Asiong Salonga nga gidala ni Erap Estrada ug gikuninitan sa mga sinehan sa tuig 1964.

Gikaintapan si Sebyo ug nabaniog ang iyang pagkabadlongon sukad pa sa iyang pagtungha sa Tejero Elementary School nga nahimutang diha sa dalan Martires nga karon M. J. Cuenco na.

Gani, makadaghan na siya’ng nakasulay ug suspenso sa ilang eskuylahan gumikan sa “drunkenness during classes, extortion ug hooliganism kon pagpanghagis sa dihang nagtungha na siya isip estudyante sa hayskol sa USP Mabini sa mga tuig 1967-1968.

Sugo-on ni Sebyo kaniadto ang iyang mga bata-bata sa pagpangilkil ug salapi sa mga tawong lumalabay sa ilang estambayanan para inom ug Añejo Rum ug palit ug plaka sa kanta nga patokar-tokaron niya sa ilang “radio-phono” sa balay. Mahiligon kaayo si Sebyo sa mga huni nga awit sa Beatles, Gary Lewis, Hollies, Hermans Hermits ug uban pa.

Mangulata, manamparos ug magkalisod mosangpot pa sa pagkaospital ang mga binuhat nga mahiagom sa mga kamot ni Sebyo nga dili makapugong sa iyang kapungot ug kasuko kon dili matuman ang iyang gusto.

Dihay usa ka higayon, nakulatahan niya ang anak sa usa ka polis.

Nadakpan si Sebyo ug gidala sa patrol car ngadto sa Ramos Police Station kaniadto.

“Pastilan nimo Sebyo, nakabayad hinuon ta ug singkuwenta pesos sa imong binuang.” langgis nga tingog sa iyang inahan nga si Mama Rosa niya samtang nag-asikaso sa pagpagawas kaniya sa bilanggoan ug human usab makatunol ug singkuwenta pesos isip areglo sa nasumbagan ni Sebyo.

Dako na ang singkuwenta pesos kaniadtong panahona sa tuig 1966. Karong panahona, Ninoy Aquino kon kinyentos pesos ang katugbang niana.

“Kon dili ka na magtinarong, hayan mapareha ka ni Jaime Jose nga gipaig sa silya elektrika.” pahimangno pa sa iyang inahan samtang nagdigamo sa ilang paniudto.

“Lo, imong tambal sa rayuma ako nang napalit.” nabati ni Sebyo ang tingog sa iyang apo nga si Loklok nga nakapapugwat sa iyang paghanduraw sa mabulukon niyang kagahapon.

Nagpunting ang iyang panan-aw sa eskina nga giimnan ug tuba sa mga batan-on. Sa maong eskina naumol ang tipaka sa handurawan ni Sebyo ang milabay nga panahon sa iyang kabatan-on. Igo na lamang siya sa paghandum niini.

Mosaysenta anyos na ang iyang pangedaron. Luya na ang iyang mga lutahan ug tuhod, dili sama kaniadto. Matag karon ug unya, atakehon siya ug hutoy. Natakbuyan na usab siya ug rayuma kon “arthritis” ug “diabetes”.

May mga apo na si Sebyo. Naputos na sa kunot ang iyang nawong ug kanunay na pud siyang mogamit ug Bigen para ipatina sa iyang buhok dala salimbong sa iyang hamtong nga pangedaron. Nahisama na si Sebyo sa dahong laya. Dali na kaayong mapukling. Mapandol na lang siya sa kaugalingon niyang luwa. (KATAPUSAN).