Cebuano Short Story: ANG TEXTMATE NI PEKTO

Share this:

Ang pagkakaplag sa modernong teknolohiya sa natad sa komunikasyon kini nagdala ug kaayuhan sa kinabag-an. Alang ni Pekto, nagdala kini ug dili masabot nga pagbati.

Mahigalaon, maayong tawo ug labaw sa tanan pilyo kon mosuol na ang pagkadali madani ni Pekto sa kaliwat ni Eba. Sa pangedaron nga kan-uman ug unom, wala siya mokalma sa gimbuhaton nga angay na lamang unta niyang ihatag sa mga lig-on pa ug tuhod. Daghan siya ug mga higala nga iyang naila-ila pinaagi sa text. Siya magpatuotuo isip usa ka batan-on nga mangita ug pareha niya ug edad.

Sa iyang pangedaron, maingon nato nga si Pekto nakaginansya na. Tigson pa gihapon tan-awon ang iyang mga bukton. Tisar pa kaayo ug barog unya pwerte pa kaayo mamustura. Maayo pa modala ug patina sa iyang buhok ug nagpatubo pa ug bigote.

Niabot ang adlaw nga gikasabot ni Pekto ang usa sa iyang mga higala sa text.
Nipahiluna dayon si Pekto sa kapehan sa may dalan Escario pag-hiabot niya untop alas diyes nga takna sa kabuntagon.

“Aha, mao na ning dapita ang gitext sa akong amiga. Kadaghan bang tawo dinhi. Maglisod man ko ug plastada sa akong kaabtik. Wala pa ra ba ko kakita niya. Unsaon man gud pulos nagsalig man lang ming duha sa unlimited text kay barato. Wala gyud ko kadungog sa iyang tingog kay dili man siya motubag kon tawagon.”

Naghinam-hinam na gyud si Pekto.

“Ihim, Love, sori ha naulahi ko ug abot.” may nabati si Pekto nga tingog sa babaye. Iyang gitan-aw ang gigikanan sa tingog. Medyo hamtong na kini nga nilingkod atubangan sa lamesa nga iyang gikapehan. Hapit motungtong sa pangedaron nga kwarenta ang iyang tan-aw sa babaye.

“Sori, wala ko kaila nimo. Dili ra ba ko magpadisturbo. Naa pakoy gibasa.” medyo garboso nga pamulong ni Pekto. “Ako bitaw ni ang imong textmate. Si Elsa. Nailhan tika sa imong gisul-ob nga body fit.” hinay apan paraygon ang tingog nga nabati ni Pekto.

“Pasensiya na. Wala gyud ko mahinumdom nimo. Ug labaw pa nga dili Love ang akong pangalan Ma’am. Pangita lang ug lain dihang maduol nimo. Naa pa kuy gibasa. ” dayong balik ni Pekto ug pakli sa peryodiko.

“Si Love baya ako lagi ni. He, he sayod man gani ko sa nahimutangan sa imong mga awom ug mga uwat kay imo man kong gisultian. Kanang imong kirat sa walang mata, nasumbagan na kaniadto sa dihang nibayle ka ug babaye nga dili nimo uyab. Kanang piang sa imong tuong abaga nga walay ayo-ayo, resulta na sa pagkatumba nimo sa motorsiklo samtang nagmaneho ka nga hubog ug nagkarga pa gyud ug babaye gikan sa Kamagayan.” Pipila ka gutlo ang nilabay, nilakaw ang babaye kay wala man gayud kini tagda ni Pekto.

Wala madugay, nibiya si Pekto sa kapehan nga wala gayud ikahibalag ang babaye nga mihaum sa bayhon sa iyang textmate.

Pagkasunod adlaw, gibasa ni Pekto ang mga mensahe sa iyang selpon nga iyang nabiyaan sa pagdinalidali padulong sa kapehan. Iya kining gigamitan ug kontrasenyas maong nakasiguro siya nga wala kini mabasahi sa selosa niyang kapikas nga si Pwerta.

Daghan ang mga mensahe. Gipaningot si Pekto sa iyang mga nabasa. Unang mensahe: “Nagkita ta ganina. Nagpakli-pakli ka ug peryodiko nga binalit-ad.” Laing mensahe: “Garboso ka man diay. Giduol na tika pero wala ka man gyud mangila nako. Tinuod estudyante ko sa kursong pagkamasahista.” Kataposang mensahe: “Sige ha, nalipay ko nga wala ta magkakuyog. Kay naabot ang akong bana nga si Bruno gikan sa Munti. Iya kong gisorpresa. Naaktohan ko niya kaniadto nga nakigtakos ug himaya sa laing binuhat. Gipasaylo na ko niya. Dala sa kamingaw, nahimo tikang textmate. Salamat ha nga wala ka madala sa tintal. Basin ikaw unta to ang ikaduhang mabawon sa akong bana padulong balik sa prisohan.”

Dili makasabot si Pekto sa iyang gibati. Nitubod ang singot sa iyang agtang ug daw sa naibtan siya ug tunok. Nabuak ang kahilom sa dihang gisampit siya ni Pwerta.

“Pekto, dali mamahaw na ta. Andam na ang bakasi nga imong gipaluto. Sinilian baya ni. Imong paborito. Molakaw ka ug sayo?” pulong ni Pwerta.

“He, he, dili ko molakaw ug sayo, bakasyon ko ron Pwerta.” ni Pekto nga nagpahiyom.

Malipayon kaayo si Pwerta nga nagtan-aw ni Pekto. Pagahikit-an na niya ang mahitabo matag human ug kaon ni Pekto sa paboritong bakasi. Nangandam siya sa dakong sambonot sa kalipay. (KATAPOSAN)

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.

Share this: