Cebuano Short Story: KINILAWNG BUNGOTON

Share this:

Si Tonying maoy hulagway sa malipayong binuhat nga puno sa kadasig ug pagmaya. Batid siyang molitok sa mga pulong nga makapalugwa sa kwarta sa pinakatihik nga tawo nga iyang baligyaan sa nagkadaiyang galamiton sa panimalay isip ahente. Matag abot niya sa kamerkadohan, hapit na lang kumpayotan si Tonying sa mga pumapalit. Halinon kaayo ang iyang lugod, bairan, palo-palo ug tadtaran. Naabtan si Tonying ug tingpaniudto.

“Adto ko sa SUTUKIL nga kan-anan ni Carla sa Pasil.” tuaw ni Tonying sa kaugalingon. “Carla sakto kaayo sa timpla ang imong sinugba, tinuwa ug kinilaw. Apan ang imong kinilaw nga kinhasong bungoton akong paborito, ang litob. Nakapalit ko ganina balig tunga sa kilong rambutan. Ganahan kaayo ko ining prutasa pud, bungoton.” dala tingsi nga pamulong ni Tonying. “Nying, ambot lang ba pero. Makalingaw man ka oi. Sa akong tan-aw nimo mura ka man ug walay busganan kon mokaon ka ug kinilaw.” mapahiyomon kaayo si Carla nga nagsud-ong ni Tonying nga pwerting nakakaon nga nagkadusingot.

Usa niana ka gabii nga ulanon, nakasuroy si Tonying sa panimalay ni Carla. “Mobalhin nako sa Manila Nying. Mingawon man gud ko nimo. Ikaw ra gyud ang dili mangutang sa akong kan-anan, ang uban dinhi masuko ug dili pautangon. Basta lahi ka sa uban. Dili ko gayud ikaw hikalimtan.” pamilinbilin nga pulong ni Carla.

Wala kapugngi ni Tonying ang pagbakho sa iyang kasingkasing. Ang bul-og sa nag-uros uros niyang kaibog ni Carla nagpabilin sa kinahiladmang bahin sa iyang galamhan. Sa kalit lang nilanog ang sipang liti. Nagkagaksanay sa usag-usa si Tonying ug Carla.

Ug sa wala lamang damha nga panghitabo, nadala silang duha sa amang nga pagbati. Gibanlas sila sa bul-og sa lawasnong kainit nga nakapakutokuto sa lantayng kawayan nga higdanaan. Natagamtaman nila ang kalipay nga dili ikapangagda.

Tulin nga niligid ang panahon, apan nagpabilin nga lunhaw sa panumdoman ni Tonying si Carla. Usa ka hapon niana, natugaw siya samtang nagkaon ug mani daplin sa aseras sa dalan Colon, “Ikaw ba si Tonying? Nabati niya ang tingog nga nangutana.

“Ako.” tubag ni Tonying. “Sulod diri sa kan-anan, gipatawag ka sa akong agawon.” pulong sa niduol niya. Wala mag-usik si Tonying ug panahon. Sa dihang nasulod na siya sa kan-anan, nakalitan si Tonying. Namarog ang balhibo sa iyang tingkoy. Naglibog siya kon unsay iyang buhaton.“Nying, salamat kaayo nga nagkita ta pag-usab. Ambongan gihapon ka. Ang imong bigote nagpabilin nga maayong pagkatupi.” malipayong babaye nga namulong ang nakita ni Tonying. Nagkugos kini ug bata.

“Carla, ikaw ba kini. Ug nanganak na diay ka? Naminyo na ka?? pusot-pusot ang pangutana ni Tonying. “Oo, ako ni”. Sanag kaayo ang panagway ni Carla. “Paglakaw nako kaniadto. Nakigkita ko sa akong uyab nga Turko nga akong gikahibalag sa facebook. Unsaon nga dili ka man gud makamao mosulti sa imong gibati. Apan sa dihang nagkita na mi, nausab iyang pag-tan-aw nako. Iya kong gibinlan ug daghang kwarta kay nakadayeg siya sa akong pagkamatinud-anon human ko siya pahibaloa nga kon kami gayud ang magdayon, dili nako mahatag niya ang akong kasingkasing.” Gitutokan ni Tonying ang bata.

“Carla, ang imong bata nga gikugos. Kandiison ug pution, liwat man ni nako.” may kahibulong nga pulong ni Tonying. “Nying Nalimot ka? Sa subra nimong pagkahingaon ug kinilaw, hasta akong bingkang tinan-ogan imong gikilaw pagdayon nakong lakaw sa dihang nananghid ko nimo kaniadto.” Nangusi si Carla ni Tonying.

“Salamat Carla nga nagkakita ta. Ug nakita ko ang atong anak. Gimahal tika Carla. Namunga gyud ang akong pagkamahiligon sa kinilawng bungoton. Nakapaliwat ko.” Mainitong gigakos ni Tonying si Carla. Gidutdot usab ni Carla ang iyang kaugalingon ngadto ni Tonying agig tubag sa gakos niini.

Nigilak ang ilang mga mata sa hilabihang kalipay. (KATAPOSAN).

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.

 

Share this: