You could put your verification ID in a comment Or, in its own meta tag Or, as one of your keywords

Cebuano Short Story: ANG KAUHAW NI OSTING

Kon moulipon ang kauhaw, mopauga sa tutunlan,
Mopasuwabi ang haw-ang nga hilabihan,
Imong kalimutaw, daw maglutaw sa kauhaw
Motuhop sa imong pagkatawo, makapanghupaw
Sa imong pag-inusara, ikaw mabalisa, makapangutana..

“Dili masayon kining uhawon ta. Hangtod kanus-a pa man? Ug kinsa man ang makatambal sa uhaw nakong makapabalisa?” ni Osting nga nag-tuaw sa kaugalingon.

“Osting, andam nako. Nakaligo na, nakapahumot pa. Magsugod na ta? ni Tesa pa nga nag-atubang ni Osting, naghulat, mga mata daw nagpakiluoy.

“Day Tesa kanindot gyud untang suhiron ug tugkaron sa pulong mong tugob sa kamahagiton. Pero…. Wala na gyud intawon. Nahutdan na ko. Naughan. Naabtan na sa pagkalumoy.”

“Sus, sa imo ra nang hunahuna Osting oi.” dala agni nga pamulong ni Tesa ngadto ni Osting. Mikupot si Tesa, nihatag kini ug kainit ni Osting nga midatom sa hinagiban niyang tinagoan.

“Pagkagrabeha man pud nimo Tesa. Wala kay pagkaluya. Wala kay busganan sa imong kakusog mosayaw. Halos matag adlaw kong makigkita nimo aron pagtudlo ug sayaw pero, halos matag adlaw sab kong magutman, abton sa tumang kauhaw. Wala man ko kadawat gikan nimo sa akong suhol. Ako intawong ipalit bisan tubig na lang unta aron dili ko maughan.”

“He, he, si Osting baya, unsa man ang imong palabihon, ang kauhaw sa imong tutunlan? O ang pagtambal sa akong kauhaw nga makat-on ug sayaw uban kanimo. Dali na.”

Niining tungora, nakita ni Osting ang bigot kaayong lawas ni Tesa, napunting ang iyang panan-aw sa mga bililhong gasa sa kalibotan nga gitagoan sa gagmayng taptap. Gisul-ob na ni Tesa ang sul-obonon alang sa iyang salmotan nga bangga sa sayaw. Sakto kaayo kining mitabon sa makita sa mata apan mobukas sa lihokang hunahuna ni Osting nga gihakgom sa tumang kauhaw.

“Sige, na lang oi. Bahala na ang kagutom ug kauhaw.” pulong ni Osting sa dihang mianam-anam ug kuyanap sa iyang galamhan ang kainit nga hilabihan. (KATAPOSAN).

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.