You could put your verification ID in a comment Or, in its own meta tag Or, as one of your keywords

Cebuano Short Story: TAGAY IBABAW SA KAMAY

Ang tagay nagpasabot ug pagdimdim, pag-inom ug pagsawo sa usa ka ilimnon tali sa mga binuhat nga gibugkos sa diwa sa panaghigalaay. May tagay nga gilarawan sa himaya ug pagminahalay. Dili hitupngan ang bation kon ikaw mobati ug kalipay sa tagay ilabi na kon kini magsukad ibabaw sa kamay.

“Tasyo, ganina ka pa man nakong nakit-an nga gasige ug yarok nianang tuba nga kisomkisom. Wala ka pa mahubog?” sukna ni Iyoy.

“Maayo kay naabot ka Bay Iyoy. Dali magtagay ta. Gustong kong malimot sa akong kaugalingon puslan mang walay nagmahal.” pulong ni Tasyo ngadto sa iyang higala. Nahimutang sila atubangan sa tubaan ni Inse Barang. Nagtagsa sila ug yaka sa bankito.

Wala madugay.

“Tasyo, unsa may nahitabo nimo?” may tingog nga mibuak sa panagtagay sa managhigalang Tasyo ug Iyoy.

Miyahat si Tasyo. Wala tuyoang mikuba ang iyang dughan sa iyang nakita. Daw dili makatuo.

“Day Tery, ikaw ba? Abi ko man gud midayon ka ug larga.”

“Sus, ikaw gyud Tasyo dali ka ra kaayong motuo. Gisuwayan lang tika ug unsay imong bation kon mananghid na ko nimo’ng molalin sa ubang lugar aron manimpalad. Apan ania. Wala man ko makaako ug pahilayo. Nahinumdom man gud ko sa imong gisaad nga tagay. ”

“Ah, este Day Tery nagtagay mi ron ni Tasyo niining tuba. Mao ni ang tagay.”sal-ot nga timang ni Iyoy.

“Unsaaa?? Kalain gud nimo Tasyo. Tuba diay ang tagayon sa imong gisaad nako?”

“Sus, ayaw pagtuo ni Iyoy Day Tery. Manglakaw hinuon ta. Nalipay kaayo ko nga mibalik ka. Nalipay ko. Salamat. Gimahal gyud diay ko nimo.”

“Yuna pa asa man ta?”

“Asa pa. Magtagay tang duha sa kalipay nga magsukad ibabaw sa kamay.” dala kawhat ni Tasyo sa lumoy kaayong kamot ni Tery.

Nitiurok makadyot si Tery sa nadungog. Apan gipulihan ang iyang kahingangha ug pahiyom. Andam na siya’ng makigtagay uban ni Tasyo aron tugkaron ang katam-is sa tagay ibabaw sa kamay. (KATAPUSAN).


Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.