HAGIT: Mga Balak Sa Pagpukaw Sa Kahimatngon Sa Kada Pilipino

Share this:

KAWA SA POLITIKA, MAY KAHINAM UG KABALISA

mibukal na ang kawa sa politika,
adunay magbuwag, may maghiusa,
kagahapon kontra, karon managhigala
bisag asa, bisag kanus-a, basta politika
katawhan, mabahin, maglibog, kita magmata….

dili ikalimod, matag higayon kon mokablit na ang kuyamoy sa politika, kini magpasabot ug pagpanuyhakaw sa nagkadaiyang panghunahuna…kasagaran kanila magtakuban, kuno mga buotan, apan sila may gipangitngitan.

mopatim-aw sa isig usa,
ang tumang KAHINAM ug KABALISA….

KAHINAM, tungod sa nagkadaiyang saad,
mga plataporma ug programa, ang tanan iladlad,
ikaw, ako, kitang tanan, sa atong mantika lutuon,
kon dili kita magmabinantayon, kita ilang lipaton,

KABALISA, kay human sa politikanhong pamukaw, mobukot ang kahilom, motabon ang kamingaw, kitang makatuaw, makapanghupaw, “Hastang mingawa na!!! Asa na man to sila?”

ANG PAGPILI
natad sa politika

ang pagpili kahigalaan ampinganan,
kitang tanan ipalayo unta sa kaalautan,
pastilan anaa man gyuy mga siawan,
kanunay’ng magtutok sa bililhong kaban
nga inampingang, tinipigan sa katawhan
himoong bugti, salapi sa pangatungdanan,

pwerteng makasaad, pinakunot ang agtang,
kuno ang pagpapili sakripisyo ug pakamatyan,
sa barongbarong mopasilong, may magpaulan
pagsalig sa katawhan kanunay’ng duladulaan
kahibalo, kamaayo ug kaligdong maoy sukdanan
kahigalaan, tukmang pagpili atong dangpan.

natad sa gugma

tulukibon, magdala ug daghang pangutana
kon tuktokon na ang ganghaan sa gugma
pagkamaayo, maoy musugat sa imong mata
mga tam-is nga pulong daw dugos, lutuon ka
mga hiwi tinabunan kay ang gugma buta
mobirig ug magpabirig, daw sunoy’g dumaga

apan sa lahutay, kon muabot na ang pagkagaay
magtinutokay, tag-as na pud kaayo’g pamitay
wala na ang kiaykiay ug lurayluray ni Inday,
si Dodong, bukotan na’g kalumoy ang kapiskay
ikaw makahinumdom, “hala, pagkalaay diay ”
ang pagpili, sinugdanan kini sa panikaysikay.

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.

Share this: