You could put your verification ID in a comment Or, in its own meta tag Or, as one of your keywords

Cebuano Short Story: WALAY NADAWDAW SI KUSOY

WALAY NADAWDAW SI KUSOY

Ang pulong aghat, sugo kini sa padasig ug kakugi. Yawe usab kini sa panukiduki.

“Kusoy, gasigi ka man lang gud diha’g ngisi..” mahagiton si Precy nga namulong ngadto ni Kusoy.

“Day Precy, tugoti’ng makapatugkad ko sa akong haligi, ug magpailawom nga magngisi. Timan-i, kini ang mahimo’ng saksi, sa akong paningkamot diha kanimo adlaw ug gabii.” ni Kusoy nga walay kukauwawo’ng nagngisi.

“Hala, barogi ang imong gipanulti ha.” matod pa ni Precy dala bundak sa iyang tiil.

“Pero, Day Precy, bisan pa’g lunlon panit na lang kini, pero mubati gihapon kini ug kasakit kon maapiki.” namahit si Kusoy sa iyang ngabil, daw gisakitan.

“Naunsa ka daw miping-it ka man gud?” natingala si Precy samtang nagpasiplat sa kanhi hinigugma.

“Naaghat lang gyud ko Day Precy. Mangayo lang unta ko nimo’g panahon aron makadiga pag-usab. Pero, sigasigahan man gud ko nimo dayon sa imong mga mata.” prangka’ng tubag ni Kusoy.

“Unsaon kuwarta ra man gud ang imong hisgotan. Unya, pagkaidlas ra ba gyud nimong paninglan.” nagminti si Precy.

“Pero Day…” wala makatiwas ug sulti si Noy Kusoy.

“Ngano ba?” pinasuko na ang pulong ni Day Precy.

“Ang akong man go’ng kumagko sa tiil, natumban sa talinis nga tikod sa imong sapatos. Nagtsinelas ra intawon ko. Gisikitan man gud unta tika aron akong ihunghong ang kalisod nga nag-aghat kanako sa pagpanghulam.”

“Mao nay gidangat nimo Noy Kusoy, karon ka na lang magsige ug birig-birig nako human ka huboi sa imong luho’ng pagkabutang tungod sa imong pagkabisyoho ug pagkalimbongan. Wala koy mahimo nimo. Byee…” gibiyaan ni Precy si Noy Kusoy nga daw naibtan ug tunok gikan sa pagkaduot sa talinis nga tikod sa sapatos ni Precy nga nakatamak sa iyang tiil.

Tinuod, napingis ang pagkatamak, sakit kaayo sa iyang panit. Bisan tuod ug panit, apan sakit lang gihapon. Walay nadawdaw si Kusoy. (katapusan).

Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.