You could put your verification ID in a comment Or, in its own meta tag Or, as one of your keywords

Balak Back2Back: GAHI vs Humok

GAHI
by Atty James Lobedica

pulong nga magdala ug kalig-on,
baskug, kamakugihon, dili agdahonon,
bantok, bus-ok, dasok ang gahi’ng butang,
balit-ad kini sa lumoy’ng kuyaw mabiyaan.

kon ikaw mobati ug kagahi, dili ka makasabot,
imong pagbati mag-umido, imong mga mata alisto,

ikaw maniguro kon tinuod ba, wala ka ba matamataha
basin sa subra’ng gahi ug pagpagahi,

ikaw motulilik, imong panan-aw, imong kusog hungaw
miabot na diay ang adlaw’ng halandumon,
mugna sa hunahuna na lang ang tanan aron damgohon,
mitapot na ang lumot sa panahon

buot mo ma’ng tul-iron ang kanhiay’ng tulumanon….
kini magpabilin’g magdukoduko ug magpaawot,
aron pagdawat sa paghukom….

HUMOK
by Tasio Espiritu

Pulong nga murag huyang kung pamation
di sama sa gahi nga isog kung paminawon
Apan ang humok molahutay man sa lantugi
di sama sa gahi alingongog lang sa pamati

Kung ikaw humok, lumoy nga mura’g bayot
apan sa kinailadman, bagtok diay sa kanunay

Di sama sa gahi nga maayo lamang sa istorbot
apan sa tinuoray nga sangka di makalahutay.

Sa humok ang balikog matul-id sa inanay
makapanglingbawot sa balahibo ni inday
Sa gahi ang tul-id mabuak ug mapusgay
makalisang apan mukoyos ug malanay.

Busa inday hunahunaa baya usa ka mopili
Kung asa ka malipay sa humok ba o sa gahi
Pinsara ug tarong kay imoha kanang kinabuhi.

Note: istorbot = istoryang botbot

For more Balak Back to Back please click this link