You could put your verification ID in a comment Or, in its own meta tag Or, as one of your keywords

Cebuano Short Story: ANG PAMASIN NI TIKBOY

ANG PAMASIN NI TIKBOY

Ang buhat pamasin mopaluag, mohulip sa damgo’ng nasaag. May mamasin nga makaangkon sa gidamgo’ng dawatonon ug tukbonon.

“Hala ka Tikboy, kasayo gud nimong naghapyod nianang manok nimo. Sa akong tan-aw, gum-os pa man kaayo nang imong gisul-ob ug kalkag pa kaayo ang imong buhok. Wala pa g’yuy ligo.” pulong pa ni Kolasa.

“Sus, mare Kolasa misayo gyud ko basin pa diay ug buwenason. Bitaw ang imong nakita karon nga akong gihapyod mao pa kini’ng akong manok, gulang na ni, igtatari pero ang sunoy nga akong tinagoan wala pa, pero andam kini’ng moserbisyo kon sa kahigayonan hatagan.” mapasigarbohon si Tikboy, nangamoral.

“Saba diha oy Tikboy. Unsa go’y serbisyo. Mura ka sab diay’g politiko? Mosaad sa wala pa pilia, apan human sa piniliay, puwerte nang mingawa.” tubag ni Kolasa.

“Ikaw ra diha? Nakalakaw na si Pare Pidot?” ni Tikboy nga naghulat sa tubag ni Kolasa. Nagngisi.

“Ikaw gyud Tikboy, wala ka gayud mausab. Dili lang kay sa sugal ka naungo, ang imong kalihokan kanunay gyud nimong gidaladala ug gitagotago.” dala tamihid nga tubag ni Kolasa.

“Ay dah, pamasin ra man gud ning akoa. Basin pa diay ug sa pulong ikaw akong madala.” gigamitan ni Tikboy si Kolasa sa iyang larino’ng pamaba.

“Hoy, Kolasa asa ka na ba! Taudtaud na kong naghulat nimo dire. Balika na intawon ko oy. Bug-at na kaayo ning akong gidala.” dako ang tingog ni Pidot gikan sa sulod sa balay nila ni Kolasa.

“Sige Pidot, paghulat mosulod nako.” tubag ni Kolasa ngadto sa iyang bana.

“Ah, este Kolasa naa diay si Pidot? Abi ko man gud ug napriso na siya. Nanunggab man gud na siya niadtong miaging adlaw. Unya sa iyang kapalahubog ug kasabaan, kanunay’ng mataktak sa panarbaho. Gaunsa man diay na siya?” mihabol ni Tikboy ang kahibulong.

“Ayaw na lang ug pangutana Tikboy, gigamit na man na siya nga maton sa atong bag-ong napili nga Mayor, gitabangan siya. Nagbaid na sa atsa ug pinuti. Mga galamiton ba sa kawad-on, magamit pud na kon mahutdan na siya ug pailob. Ako siyang gipahulat kay nanghipos pa ko dinhi sa hinayhay nakong nabuntagan.”

“Pare Tikboy, ikaw man gud ni. Nag-estoryahay diay mo ni Kolasa?” siga kaayo ug mata si Pidot sa sikit nga panagkukabildo nila ni Kolasa ug Tikboy.

“Oy, Pre Pidot, salamat nga miabot ka. Ako lang gud unta’ng ihagad nimo ning akong manok kon mamusta ka, muabay ka ba? Manigbakay ko karong buntag, mamusta ka?”

“Ah, wala ko’y plano Pre, dili man ko sugarol. Pero sikit man ang inyong panag-estoryahay sa akong asawa, dili ba?”

“Unsa Pre? Dili ko kadungog nimo Pre. Medyo bungol man gud ko.”

“Ikaw ba, sikit kaayo kang nakig-estorya sa akong asawa!!!”

“Pre, mamusta ka? Mao ni ang manok nga atong pusta-an.”

“Ah, bungol man diay ka. Kolasa dali sulod na diri. Abi kog gidigahan ka sa pagkahimabaye ni Tikboy. Andam na ra ba ning akong pinuti diri ug atsa.” ni Pidot pa nga nagkupot ug atsa.

“Sige Pidot anha na ko.” Nagdali si Kolasa ug biya padulong sulod sa panimalay niini.

Nahabilin si Tikboy, gipaningot.

“Sus, paita ning mamasin ta. Delikado ug masipyat, maigo pa ko sa pinuti, o dili ba sa atsa. May maayo pa’y maligo na lang ko. Hapit na gyud. Wheew!!” daw naibtan ug tunok si Tikboy. (KATAPOSAN).