You could put your verification ID in a comment Or, in its own meta tag Or, as one of your keywords

Featured Balak: BUGNO ug IKOG

BUGNO

buhat nga magbarog sa kahimsog,
makapabathay sa ugat, makapatandog
may mabuntog, may makadaug,

may dali’ng makapabarog,
may hunahuna lang ang matandog,
may mokupokupo, may malup-og,

may maghatod ug kalaay
sa bugno, dali rang mosapinday
pulong ug palusot lang diay

mga dodong ug mga inday
pangandami, hinumdomi kanunay
bugno, makapatabisay sa laway…

IKOG

Kabahin kini sa lawas nga manuyhakaw,
Mokitiwkitiw, mobaliwliw, makalingaw
Kusog molihok, sa tan-aw makatagbaw

May dagko ug may gagmay’ng ikog,
Tawagon kang ikogan kong may ikog,
May magpakaaron-ingnong may ikog,

Ikaw yam-iran, kon walay makitang ikog
Kay ikaw diay, dili makamaong maikog
Modayo’g talikod, sayo kaayong matulog

May mapasigarbohon sa naangkong ikog
Kahibudnganan, dili makita apan kuno isog,
Kon tutokan, nagsalig diay sa kabatan-ong kabaskog

Kon mobahag ang ikog, timailhang nanalaw
Kon manudlo, kini siguradong may gitan-aw
Kon manukod, nagtugkad sa lawom nga kamingaw

May ikog nga dumpol, tuy-od ug balikog
May magsangkiig ug aswat sa kaugalingong kusog
Magkadaiya ang hunahuna kon hisgotan ikog

Daghang hambog sa imnanan, mga palahubog
Wala gayuy kaikog sa matugaw ug makadungog
Adlaw ug gabii, gatagawtaw kanunay’ng isog

Pagkadimalasa, sa padayong paghuboghubog
Ubo na lay madungog, ang kanhiay’ng ikog
Nga maisog, sa suok kanunay na lang maglubog.

Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.