You could put your verification ID in a comment Or, in its own meta tag Or, as one of your keywords

Balak Back2Back: Kagidlay VS Kuyaig

KAGIDLAY
ni James Lobedica

pulong nga magpasabot ug kapit-os,
kakulang sa kahigayonan’g makalampos,
makalingkawas sa kalisod, sa mga ladpos
sa mga pagsuway nga maghaguros…

sa paningkamot, sa mga naningamot,
sa mga nagpasingot, sa mga nagbagotbot
ang kagidlay, magpahipi nga magpaabot
sa kahigayonang, mahutdan ug paningkamot…

buhat nga magdala’g kaayohan, ting-usbawan
walay paglubad nga kakugi, mga hinagiban
batok sa kagidlay, kini ang iwag sa dalan
kagidlay, mahimong kauban, mahimong malikayan…

KUYAIG
ni Tasio Espiritu

usa ka pulong alang sa tinood nga nagkalisod
apan dili sama sa nagkagidlay nga wala nay nahot
dunay nagkuyaig apan makakaon ug katulo kada adlaw
dili sama sa nagkagidlay nga way madawdaw bisan bahaw

mahimo pod ang kuyaig alang sa nagkahigugmaay
bisan ug nagkalisod si dodong sa pagka-iyat ni inday
gipaningkamutan nga mahatag ang tanang gipangayo
aron sayon mauyonan ug manghagad na dayon ug minyo

dunay nagkuyaig tungod sa pagpaugnat sa kusog
sama sa boxing, karate ug apil sad ang dulog-dulog
nagkuyaig si ondoy naglisod ug pahiluna sa higdaanan
kay piot kaayo alang kanila ni inday nga iyahang tandayan

ang kuyaig alang sa tanan nga nagmalampuson
dili sama sa nagkagidlay nga kutob ra sa pagmahay
nagkalisod man sa tinood apan misukol ug nagpadayon
ikapasigarbo nga bisan ug nagkuyaig wala man magkagidlay

For more Balak Back to Back please click this link