You could put your verification ID in a comment Or, in its own meta tag Or, as one of your keywords

Featured 2 Balak: DALIKYAT and NAGKALAIN-LAIN ANG KANDIIS

DALIKYAT

Pulong pasabot ug paghapit,
Pagsuta kon wala ba mabitbit
Basi’g sa laing kamot, mapunit….

Ang pagdalikyat, kinawatkawat
Linaktan mag-apas, makapugwat
Imong gininhawa daw maahat….

May modalikyat ug timo,
May modalikyat ug himo,
Ang pagdalikyat dili ikasugo….

Sa pagdalikyat, ikaw maniguro
Magdalidali aron lagi makasiguro
Tilaw, simhot, kaon, kilaw, singo….

Pagkadaghan gayud sa magdalikyat
Ampinganan’g dili masipyat sa pagdalikyat,
Basin ug mahinog, mahimo kining liwat….

NAGKALAIN-LAIN ANG KANDIIS

kandiis nga dayag makita:
“kaguwapaaa, kandiison lagi na siya…”

kandiis nga dala sa subra’ng timbang:
“Ah, grabbeeeh…..hasta lukon-lukon nangandiis?”

kandiis nga tinagoan, dili pahayagan:
“Tinuod ni Noy? Kandiison lagi, murag pulos panit..?

Pasagdi lang Day, dala lang kana sa katulogon. Hala, paghinayhinay lang, aron dili siya matugaw, dili mapukaw, basin ug mubalhin ang pangandiis dinha sa tam-is nimong pahiyom..” namulong si Noy Kuyos samtang nagpahilot sa iyang panuhot ni Inday Kordapya…

ang kandiis nga gikagubtan sa kaliwat ni Adan…

badlis sa panagway,
talan-awong mubathay matag talidhay,
kiyoom kon magpakahilom,
molutaw kon mopahiyom,

makapadugang kini sa kaanyag,
sama’s gihay matataw kon mobuliskad,
makapakandiis ang subrang timbang,
manurok kini hangtod sa imong tinaguan,
kandiis kahimut-an, kaibgan ug kagubtan,
sa kaliwat ni Adan.