Paghanduraw
ning maong kagabhion
gihandum ko ikaw
saksi ang bulan sa’kong
gibatyag nga tumang kamingaw
saksi ang mga kabitoonan
sa matag lusok sa luha uban sa panghupaw
misamot ang akong paghanduraw
nga sa kalit milapdos kanako
ang huyohoy nga mabugnaw.
gibati ko’g katugnaw
nagpanglingi – sa unahan ako nagalan-taw
apan wala ikaw..
gisinggit ko ang imong ngalan
apan agi’g balos akong nadungog ang alingawngaw
asa ka man diay karon
ug ako mipiyung ug gipaminaw ang hagawhaw
akong naamguhan nga sa kanunay ania ka sa’kong dughan….
Ako, Ang Maong Bulak
mabulukon nga sa hardin nangalimyon….
mahigalon ug mapahiyumon..
may hiyas nga di makita sa bintana sa mata sa tawo
apan kini mabatyagan diha sa ilang kinahiladman.
…yano lang ang akong pagkabulak..
akong dahon mga tag-as ug talinis ang tumoy…
..apan kung ang buyog masangit niini o mahulog..
dili kini makaakong makapasakit
hinoon matusok ang buyog sa lalum nga gugma
ug mitaop sa dahon sa iyang pagkabulak……