“Dintang ne I Troy!”, anang Darang Terya
“Samalan mung miblas pota akaynipan naka”
Ing malagung maryeta aneng kaslag keng sulud na
Ing panlawe ku kaya bala mu metung yang artista.

Inabit neng inda, “samalan mu” ana kaya.
Ining Maryeta, timan timan ne mang bagya.
Nganang maryeta, “marine ku ima”
Sepingil neng dara “ot marine ka” ana kaya.

Reng siping bale, pakasilip la ngan awang
I Tasyo uyta, pane yang lalabas at manabang.
Makiusyoso no naman deng magtindang derang
Bala mo hari ya ing panenayan a dintang.

Paksibangut ne man I Apung Konching keng lalam kwayan
Ene kanu kapad ining dintang a dayuhan
Reng kanung kayang amanu edana pakiramdaman
Mengisnawa yang saldak kareng kayang belikdan

Kwentu ng Apu, anya kanung kayang kayanakan
Metung yang sundalong Kano ing megi ng katipan
Dinuku ya at ing lua na sasagueseng alang katuknangan
Ninanu ko Apu, iyang kakung kitnangan

Kaya kanung tikyan kanita ing amanwan nang liguran
Keng malaut memale la at ing balen kayang kelingwan
King pilang banwa dang miyabe adwang anak kayang peragulan
Ing kayang balen Sta. Ana, pilang banwa neng likwan.

Reng adwa nang anak mengaragul la at memagaral
“Taksyapo ra” ngana, ambis nanun pang pangaral
Kesyasan da buntok iyang karelang pepairal
Keng karelang pamandagul matni lang memirapal

Mengayari no man at I Apung Konching kinupas ne
Metwa ne at reng anak na kinawani no keng karelang bale.
Iya naming melakwan nyang ing abe na mete ne
Uyts rugo ing inda ra magdili-dili nya keng lele.

Pipasa-pasa re deng anak neng alang malyaring lumingap
Neng magobra no reng adwa at pane obra at pangarap
Keng malaut a lugar kanu, dapat mung maging maagap
Neng kekamalan ning biye e masaguling mangapkap.

Anya ing indang makalunus, inyad na naming muli Sta. Ana
Keng kayang balen a malambat ng e inulyan a likwan na.
Ikit na ing lingap kareng kapatad at pangunakan ra,
Ing antitang lugud kanu talagang alang kapara.

Maswelo kanu ing makalumud keng manyaman a biye,
Malaya kang kumilos uling asali mu ngan ing bage.
Uling keng biye reng kalulu pane nalang mamalebe,
O nung makwalta ka kanu, balu mu maski nanu kekang asalese

“O ngeni” ngana “mekulung ku keni keng malaut a marangle
Eraku agyung lingapan reng anak kung kakung dininan biye”.
Ilang mengulong kanaku kaybat kong gewang matibe
Obat melako no panahon keng masaguling pamiyabe-abe.”

Dinuku ya ing matwa kabang ing kayang lua sasaguese
Pasalamat yang alang patugut keng kakung pamanantabe.
Keng kanakung prisenya aganaka ne kanu ing tete
Nung nokarin memyalungan lang mi-iinda, masaya kanung tune.

Melunus ku kang apu, mengaspak ya ing salu ku.
Kinaul keng matigik, mipa-lua ku at ing sibi-sibi ku rugu
I Maryeta ngana, malyari sana ere pakisubu
Uling nung milaut ya keni, magkasakit yang tutu.

Ing gamitan ing pamakyasawa para keng kekang pangakwalta,
Sagulyan mu ing manyaman at masalese pamangisnawa.
Iting isip a bala mu pemisali mu ne ing kekang kaladwa,
Ing tune kuswelo manibat keng puso, iya ing alang kapara.

Sibi-sibi ya I Apo kabang I Maryeta lalwen ne
Reng tao keni ngana ala lang pamagbayung tune.
Bisa la ngan tumakas kening lugar marangle,
Sinawa no kanu keng albug at tete mamalebe.

“Apu ko tandanan mu” ngana, “nung bisa kang mi-atna
Pagkasakitan ngan ing bageng kekang buri akwa
Nung naman pamalit mu ing kekang biye at kaladwa
Ing luban mung ita metung yang marimlang selda.”