Ayaw intawon hikalimti, Ayaw intawon ibaylo
ni Tasyo Espiritu

Ayaw intawon hikalimti
ang kabilin sa mga bayani
Patay na man t’uod ‘to sila
ang ilang pakigbisog, buhion ‘ta hangtod kanus-a.

Ayaw intawon sila ibaylo
sa mga kawatang politiko
Buhi pa man t’uod ‘ni sila
apan ang ilang mga kalag gi-uod ug nadugta na.

Ang Tinuoray nga Kalinggawasan
ni Tasyo Espiritu

Kalinggawasan sayon litokon, lisod tukibon
Katilingban kutob ra sa pagpakaaron-ingnon
Gawasnon kuno pero ulipon ra diay gihapon
Nagtingkagol nga pang-hunahuna dili utrohon

Kung ikaw papiplion sa kinabuhi ug kamatayon
Pilia ang nahiuyon sa pakig-bisog nga nasudnon
Ayaw lang palabi kay basin di unya ka masabtan
Ug ang imong ikabilin mahimo lang kataw-anan

Tinuod nga Kalinggawasan, pangandoy sa tanan
Sama sa butang, ang kagawasan adunay  utlanan
Tinuoray kang Gawasnon kung kini imo masabtan
“Tawhanong katungod sa uban dili nimo yatakan”