KASINGKASING
by Atty James Lobedica

kini ang sentro sa mga balak,
awit ug mga komedya,
mga dula ug mga drama,
atong higala sa pag-inusara,

sukaranan sa kalipay,
hinungdan sa pagsusapinday
may bukotan ug pagmahay
makapahupay sa kalaay,

batan-on, tigulang, mga bata
kitang tanan hinigtan sa talikala,
sa mga linagubo, kinagulkol,
sa kulba nga dili mahinultol,

pinitik ug singgit sa atong tinguha
piyongon mo man aron dili makita
kasingkasing ikaw mopahimatngon..
“Lab-dab, lab-dab..lab-dab……..”

UTOK
By Tasio Espiritu

dinhi namugna ang balak
dunay tinood, dunay bakak
makapahilak, makapaiyagak
ug mapakatawa nga buhakhak

dinhi sa utok gihulbot
ang sapot ug kayagotgot
sa mga gibati nga kapungot
sa di kapugngan nga kalagot

apan kung imo nga pilion
ang hunahuna’ng matarong
ang makabasa magmalipayon
sa imong balak nga maligdong

kay kung sa kasingkasing
lamang nimo paminawon
ang balak dili makatayming
ug magkagubot na hinoon

gamita ang alimpatakan
kay wala kanay kinutoban
dili sama sa imong dughan
kutob lamang sa sinugdanan

For more Balak Back to Back please click this link