Cebuano Short Story: DILI PA ULAHI ANG TANAN

Share this:

Matag binuhat ning kalibotan, naglatas ug lainlaing dalan sa kinabuhi. Sa atong kaugalingon, nahimutang ang pagpaningkamot ang pagpaninguha ug pagpanlimbasog. Kon unsa ang mahimong sangpotanan ning tanan, andam kita sa pagdawat niini. Taliwala ning bagang dag-om sa unahan, tugotan tang mogitib, molipang ug mosalingsing ang makanunayong paglaum. dili matay-og bisan pa sa pagkusokuso sa bagyo sa mga pagsuway.

Si Dong nagpungko, nangyugpos ug namulong, “Pagkanindot sa kabuntagon, apan ania walay kwarta, walay sulod ang bulsa, pagkadimalasa.”

Nakabati siya ug tingog,”Dong, nag-inusara ka man gud dinhi.Hala kuyogi hinuon ko, mopalit ko ug budbod, akong ipamahaw. Palitan lang pud tika.”

Giwahing ni Dong ang panan-aw, “Ikaw diay, Kurdapya?”.

Gisugdan ni Dong ug tutok ang pamayhon nga nakita. Madanihon kaayo kini ug walay lama sa kausaban ang kaanyag niini.

“Ayaw na lang pagpalit didto, tagaan tika, libre ug siguro kong makauyon ka.” ni Dong nga nagngisi.

“Dili ko oi, kanang budbud nga kanunay’ng nagpungko, dili gani makapamao maningkamot, maghulat lang ug naay kapahimuslan ug kaduwaan.”

“Nganong nakasulti ka niana?”

“Unsaon, ang kwarta nga imong napanunod sa imong mga ginikanan, imong giwaldas, gibisyo. Wala ka gayud maningkamot ug barog sa kaugalingong tuhod. Ari na lang
ko ha. Pakit-a ko ug kausaban Dong.” pulong ni Kurdapya dayong biya ni Dong.

Si Dong naugbok sa iyang nahimutangan samtang nagkahanaw sa iyang panan-aw ang kanhi hinigugma. Nakaamgo. Dili pa ulahi ang tanan. (KATAPUSAN).


Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.

 

Share this: