DAKONG SAGPA SA KALINAW UG KAHUSAY

Share this:

DAKONG SAGPA SA KALINAW UG KAHUSAY

Mitay-og sa dakbayan sa Sugbo nga nakapakugang sa katawhan ang duguong balita kagahapong adlawa, Enero 22, 2013, ang pagpamusil ug pagkutlo ug duruha ka kinabuhi sa hawanan sa hukmanan mismo nga gituhoang tighatod ug hustisya.

Aduna pay nag-ungaw sa kakuyaw hangtod niining panahona, ang babayeng piskal nga nahimong biktima usab sa panghitabo. Ang mamumuno wala madugay, napukan ra usab ginamit ang susamang paagi sa paghakgom niya sa balaod sa iyang mga kamot.

Nanggimok ang daghang pangutana sa atong hunahuna. Ngano nga nahitabo man kadto? Unsa man ang nagpaluyo’ng hinungdan nga kinahanglanong taposon man gayud ang tanan kagahapong adlawa? Aduna bay lawom nga hinungdan nga bugtuon sa duguong pamaagi ang tanan?

Dili susama sa naghitak nga krimen nga atong mabasahan sa mga peryodiko ug makita sa telebisyon, dili binuhatan sa magmaskara nga magkabayo ug motorsiklo ang panghitabo. Ang mamumuno, naningamot, sa kaugalingon niyang kamot gibuhat ang dili ikapahimuot nga binuhatang nagdala ug kadaot.

Daghan ang nakalitan sa kakalit sa panghitabo nga bisan pa sa asoy sa mga buhing saksi sa nahitaboan, daw gilamat sila sa nakita nga sa kalit lang mibanaw ang dugo, hulip sa makabungog nga kahilom.

Matag usa kanato adunay panghunahuna, adunay tagsa-tagsang pagbasa sa panghitabo. Ang mga haligi sa hustisya angayan natong tutokan, atong panaminan. Ang krimen nahitabo mismo sulod sa hukmanan, dayag ug tataw kining makita sa katawhan. Ang mamumuno ug mga biktima, nalambigit ug asunto nga dili gani makapanlimbawot sa balahibo.

Kitang tanan nga nagmata sa kamalinawon, sabton tang dakong sagpa sa kalinaw ug kahusay kining duguong panghitabo nga dili angayang pasanayon.

Share this: