DISYEMBRE

tugob sa dayandayan ug kamabulokon,
daw bangaw sa sayong kabuntagon,
maghudyakang mosugat sa kabugason,
panaygon ug daghan pang tulunggon,
magpasad daw mga uhong kon ulanon,
Disyembre, bulan nga pinakaalegre,
apan daghan pud ang mangamoti,
sa hinatagay ug dinawatay maapiki,
samtang ang mga modawat magngisi,
may manghatag nga magkisikisi,
kay panudlanan kuno alkansi,
Naagian ni Yolanda’ng daw tigre
hala, hudyaka ug pangaliya ibayaw ta
sa kalipay ug kasakit, mag-ambahan ta!!!

TUGNAW – dili kapangandakan kon tugnaw ang hisgotan, kon palibot magdalag kabugnaw nga dili kasarangan, may kaugatang mangyugpos, may mangupos, kining tanan buying talan-awon sa pangandoyng nahushos, kon sa tugnaw ikaw harian, ikaw usab hikawan sa painit nimong gikahinaman…

ALKANSIYA – sudlanan, butanganan, pundohanan, ug tagoanan, sa nagkalainlaing sinsiyo nga tinipigan, alang sa mga tihik ug suki sa panudlanan, tiyanon nga budha ug bagol himoong unggoyng alkansiya, apan adunay pipila pud nga manurikbot ug alkansiya, kon alkansiya tigomanan, mahimo usab kining kuhaanan, magkalisod, dali kaayong mapahimongtan, ilabi na kon sa pamugas ug panud-an, ikaw mahutdan..