Cebuano Short Story: MAG BAG-O NA KO

Share this:

MAG BAG-O NA KO

“Sus pagkalisod niining magdrayb nga tigulang na. Unsaon man pud ning drayber nako’ng si Tirso mipauli man kay pista kuno.” Namulong si Noy Dolpo sa iyang kaugalingon samtang nagmaneho. Nasubraan siya sa inom human mitambong ug kumbira.

“Day, naabot na ko. Hala pagmata ug pangandam na. Human sa gimbuhaton, mamahulay tang duha.”ni Dolpo pa nga nagsarasay. Nakasingo siya ug pahumot nga sinati kaayo niya. Tuod man, dali kaayong nakapabuhagay si Noy Dolpo sa gitinguhang kalipay dala sa kahubog.

“Sige gud, nagbinag-o man ka. Karon ka pa man mag-iningon ani Noy Dolpo.”ni Alma pa nga nahibulong, apan wala madugay mibanos ang hangos ug igham nga naghaguros. Ang kahubog ni Dolpo daw unos, pwerteng nakapamuspos.

“Day Alma, nakauli ba si Noy Dolpo nimo. Wala man ko makamatngon sa iyang pagpauli.” sukna ni Bebang sa katabang. Nabantayan niya’ng nanglawom ang mga mata ni Alma. Mantikaon kaayo ug linihokan sa kahinay.

“Kahinay gud nimong molihok diha. Sayo ka man untang natulog gabii?” nahibulong si Bebang sa katabang.

“Naluya man ko Mam, unsaon gipatrabaho pa man ko ni Noy Dolpo pag-abot niya ganinang kaadlawon.”

“Unya wala man lagi ko makamatikod niya nga miabot?”

“Ay, kasakit sa akong ulo.” tingog ni Dolpo ang nabati ni Bebang gikan sa lawak sa katabang.

“Oy, Dolpo nag-unsa ka dinhi sa lawak ni Alma?”

“Ah Day Bebang, sus, kalisod gyud niining matigulang na ta. Masayop na gyud. Puwerte nakong hubogan sa akong pagpauli. Ultimo pagsulod sa lawak nato wala ko makatultol. Abi ko man gud to’g ikaw akong nakauban kaganinang kaadlawon pag-abot nako. Nasingohan nako ang imong pahumot.” dala hikaphikap ni Dolpo sa iyang ulo.

“Unswaa” nakalitan si Bebang sa iyang nabati.

“Alma, diin ka man manguha ug pahumot?” sukna ni Bebang sa katabang.

“Gihatagan ko ni Tirso ug pahumot Nang Bebang isip regalo human sa akong pagsugot niya sa milabay’ng semana. Mao man bitaw tong miuli siya sa ilaha aron makapahibalo sa umaabot namong pagpakasal.” malipayong pahibalo ni Alma.

Mipasunding sa hunahuna ni Bebang ang nanglabay’ng panghitabo. Sa pangedaron ni Dolpo nga padulong na sa kan-uman, kanunay na lamang siyang talikdan sa higdaanan, magtimi-timi, dili na gyud mokaon bisan pa ug iyang sukaran sa mahagiton niyang sinul-oban ug tinan-awan. Nihit na gyud kaayo.

Sa wala damhang panghitabo, natintal siya sa ilang drayber nga si Tirso ug iya kining nahatagan ug pahumot. Gihatag pud diay kini ni Tirso ngadto sa ilang katabang nga si Alma.

“Kon mao kana Dolpo hala kaligo didto kay nahubog ka man gud, naglabad ra nang imong ulo. Ug ikaw Alma ayaw na kalimti ang pagpahibalo kon makauli ug kaadlawon si Noy Dolpo nimo ha aron dili ni siya mabuntagan diha sa imong lawak.” nausab ang tingog ni Bebang.

“Ah Bebang, wala ka masuko? Nabuntagan ko sa lawak ni Alma?” naulian si Dolpo gikan sa kahadlok nga mabugnoan sa maldita niyang kapikas.

“Nakasabot ko Dolpo bunga ang tanan sa imong kahubog. Susama ra ang akong pahumot sa gigamit ni Alma ug kini maoy nakapatukmod kanimo sa pagkasayop. Sayod ko nga imo gyud diay kong gihunahuna ug gimahal.” pulong ni Bebang nga mahinangpon.

“Maayo kay nakalusot ko. Magbag-o na ko.” pulong ni Dolpo sa hilom. Mibuhi ug pahiyom.

“Sus, kaayo baya gyud untang bugnoon niining mga tawhana, apan ayaw na lang. Magbag-o na ko.” pulong pa ni Bebang sa kaugalingon samtang nagtan-aw ni Alma nga nagkurikuri sa mga gimbuhaton sa panimalay ug ni Dolpo nga milakaw padulong sa ilang lawak aron mangandam sa pagsugat sa bag-ong adlaw. (KATAPUSAN).

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.

Share this: