NAPULING SI DODONG SIKYO SA BOMBA

Ang pulong bomba makapatay-og ug makapakurog, molanog ug magdahunog, kini ang bomba’ng gitanom, ug sa kaisog mohakgom. May bomba’ng makapahinuktok, makapatiurok, ikaw ilansang sa kahingangha, magsiga na lang ang imong mata.

Usa ka adlaw niana. May nag-inusara’ng naghilomhilom, dali’ng gisusi ni Dodong Sikyo. Nanuktok siya sa ganghaan, apan walay imik padayo’ng gitak-opan ang gisudlan. Namugos siya sa pagsulod ug siya natiurok, sa nakita siya dili makatutok. Pagsuta diay niya, mibad-ay sa iyang mga mata ang makapanlimbawot nga bomba.

“’Oy, Dong Sikyo, palihug ko ug sira. Ay dahhhh, naghigot ra ko’s akong hiramenta. Papiitay man gud ang indigay, ang bugdo ipahapsay, ang dagko ipagamay. Hala tutoki, susama na ba kini kang Inday?” ni Charot pa nga misalmot ug paguwapahay, bangga sa mga hilaw nga Inday.

“Sus, maayo man gud kaayo kang moikid-ikid. Nangalimyon ka sa kahumot. Misulod ka dinhi sa pansayan sa mga lalaki.” pulong ni Dodong Sikyo nga nangutkot sa iyang ulo.

“Hala, tabangi hinuon ko diri ug higot ning akong sunoy aron dili makasikad.” dala parayeg nga pulong ni Charot.

“Unswaa!”, nagkadusingot si Dodong Sikyo. Nasaksihan niya ang bomba nga makapuling sa mata. (KATAPUSAN).

Patnubay.org wishes to thank Atty James Lobedica for giving us the permission to publish this short story in our website. Atty James Lobedica is a lawyer based in Cebu City. He advocates perservation of Cebuano language and culture. He finished his Bachelor of Laws at the University of San Carlos – Cebu in 1992.